Cagayan de Oro City – Ang Misamis Oriental Task Force Covid-19 nagbutyag nga ang provincial government sa Misamis Oriental nagpabarog karon sa bag-ong facilidad alang sa isolation and treatment ug magpahimutang sa duha ka provincial hospitals alang sa nagkataas nga kaso sa coronavirus infections. Ang maong bag-ong facilidad, matud pa ni Atty. Jeffrey Saclot ang tigpamaba sa Provincial Covid-19 Task Force anaa gipahimutang duol sa administration building sa OWWA-Alubijid Provincial Hospital.
Ang nasangpit nga lakang nauyunan tapos sa panagtigom nila sa Regional Director Adriano Suba-an sa Department of Health-10 uban ni Governor Bambi Emano sa presensya ni Provincial Health Officer Jerie Calingasan kinsa maoy namuno sa maong task force. Ang bag-ong facilidad adunay 26 ka maximum bed capacity nga magsilbi nga treatment and isolation facility base sa existing plan sa provincial governments.
Gidugang sa pagsugilon ni Atty. Saclot nga gisaad ni Health Director Subaan sa paghatag sa assistance alang sa conversion sa Manticao Provincial Hospital ug Talisayan Provincial Hospital ngadto na sa COVID-19 hospitals nga maoy mo-cater sa mild-moderate cases.
Apan gipasabot nga ang mga Covid-19 patients nga adunay severe ngadto sa critical symptoms adto gihapon i-refer sa state-run Northern Mindanao Medical Center sa Cagayan de Oro, isip referral hospital dinhi sa rehiyon. (Provincial Information Office)