Cebu City – Mikabat og kapin sa 12,150 ka gramo sa shabu, marijuana ug hupas na nga mga tambal ang gisunog pinaagi crematorium sa Cosmopolitan Funeral Homes sa dan Junquera, Cebu City gahapon sa buntag.
Ang naasoyng mga droga gibanabana nga mobalor og ₱ 77 milyon samtang ang expired medicines gikan sa lisensyadong pharmaceutical companies kantidad og ₱ 1.9 milyon.Gisaksihan ang pagdaot sa mga dinaling droga sa kadagkoan sa Philippine Drug Enforcement Agency o PDEA – 7, Police Regional Office o PRO – 7 ug pipila ka representante sa kagamhanang local.
Suma pa ni Director Levi Ortiz sa PDEA – 7, ang pagsunog sa maong mga illegal drugs adunay pagtugot korte.
Matod ni Ortiz, kinahanglang mananghid sila sa hukmanan tungod kay ang ginadiling droga nga ilang nasakmit gigamit mang ebidensiya sa mga kaso.
Giklaro sa PDEA nga dili sila makasayon-sayon pag-destroy og ebidensiya kon walay court order.
Ang gipangsunog gahapon nga mga droga, marijuana ug medisina, nasakmit sa PDEA – 7 ug kapolisan sa Metro Cebu. (Jhon Tadlip/ JTY, photo courtesy of PRO – 7)
(Source: PDEA – 7)