Gihangyo karon sa 500 ka residente sulod sa 80 ka bubong sa Sitio Bacong, Barangay Taguilon, dakbayan sa Dapitan ang kagamhanang lokal sa maong dakbayan nga dili na babagan ang dalan nga gihimo sa kagamhang probinsyal sa Zamboanga del Norte sa pagpangulo ni Governor Roberto Uy.
Kaniadtong Marso 11, nag-rally ang katawhan sa maong dapit isip pagpakita sa ilang pagsupak sa gihimo sa pamunuan sa Dapitan tungod kay dugay na nilang gipangandoy ang maong dalan.
Sa pamnahayag ni Kanhi Barangay Captain Ruel Nadela sa Sto. Nino, dakbayan sa Dapitan nga nagkasinabot ang nanimuyo sa Sitio Bacong, nga ipakita ang ilang suporta sa kagamhanang probinsyal aron mapadayon ang maong dalan latas padung ngadto sa Sitio Baclay sakop sa Barangay Sto. Nino diin adunay gitas-on nga unom ka kilometro.
Dugang ni Kanhi Barangay Captain Nadela nga kaniadto sagad sa mga residente magsakay ug banka ngadto-nganhi sa syudad.
Apan kung panahon sa bagyo, magbaklay lamang sila gikan sa Sitio Baclay, padung sa Sitio Tangian gawas sa Rizal Park.
Aduna usay higayon nga ang mga bata dili kaagi sanglit adunay pangpang sa maong dalan.
Kung ting-ulan, mahumod pa ang mga bata hangtud dili na maka-skwela.
Busa, naka-desisyon sila nga mosulat ni Governor Uy aron mahimuan kini ug insaktong dalan aron adunay maagian panahon sa ting-bagyo. Niini, gihatagan gilayon ug aksiyon sa probinsya ang maong hangyo.
Gitataw usab ni Nadela nga wala panamastamasi ang kinaiyahan sumala pa sa alegasyon sa Dapitan, ug igo lamang sila nagpahimo sa maong dalan.
Niini, gihangyo ni Kanhi Barangay Captain Nadela ang mga opisyales sa Dapitan nga lantawun unta ang katuyuan sa maong dalan diin mapahimuslan sa katawhan.
Samtang si Jerry Batal, ang Presidente sa Bacong Livelihood Association ang nanawagan usab sa namunuan sa Dapitan nga unta dili nila babagan ang maong proyekto sanglit dili lamang kini alang kanila, kondili lakip sa makapahimulos niini ang mga kabataan.
Gibati sila’g kaluoy sa ilang mga anak nga magbaklay lamang padung sa syudad aron lamang mo-skwela ug nabalaka usab sila kay basin mahulog sa pangpang.
Dugang awhag ni Batal nga dili na nila babagan ang kalipay nilang mga residente lakip na sa mga kabataan.
Pamahayag usab ni Batal nga ang mang proyekto nga dalan nasugdan kaniadtong bulan sa Disyembre sa tuig 2020 ug nahunong sa hinapos sa Pebrero atul sa pagbabag sa syudad.
Bisan paman sa maong kakulian, si Batal naghangyo ni Governor Uy nga ipadayon ang nasugdan nga kalsada alang sa kaayuhan sa Sitio Bacong, Sitio Baclay ilabi na sa mga kabataan nga nagkinahanglan ug kalsada.
Si Fortunato Bacus, ang Purok Coordinator sa Sitio Bacong, mihangyo usab sa namunuan sa Dapitan nga dili babagan ang maong proyekto tungod kay daghan ang nakapahimulos niini.
Dugang ni Bacus, nga kung gusto sila ug kaangayan, malipay ang mga tawo dili nila kini nila babagan.
Unta ilang huna-hunaon nga ang mga tawo malipay nila, dili hatagan ug kapungot sa namunuan sa syudad.
Gipaklaro ni Bacus nga ang maong proyekto sa probinsya dili kini pamolitika aron madani ang mga tawo, kondili alang sa kalambuan sa Sitio Bacong.
Dili na usab sila maglisud unya pag-adto sa syudad lakip na ang ilang mga anak ug mga apo, busa gikalipay nila kini sa maayo.
SI Bacus mipaabot usab sa iyang dakong pagpasalamat ni Governor Uy sa maong proyekto sanglit wala na niya kini damha.
Nagpasalamat usab siya sa proyektong patubig nga ihatag unya nila dungan sa kalsada.
Lakip sa gipaabot nila nga awhag sa mga placards mao ang “Para sa mga estudyante nga dili na maglisud ug tungha ug modagko ang balod”, Pls. ipadayon ang among gipangandoy nga kalsada, ipadaplin ang pamolitika, tungod ug alang sa kaayuhan namong lumolopyo sa Sitio Bacong ug Sitio Baclay ug sa among sumusunod nga kaliwatan”.
Nasayran nga ang maong proyekto gibabagan sa kagamhanang lokal sa Dapitan gumikan kay matud pa usa kini ka protected area. (Provincial Information Center-shengbmontederamos)