Tumang kalipay sa mga kwalipikadong public utility driver sa lungsod sa Alabel ug Glan gumikan sila ang unang nakadawat og Singko Mil ka pesos (₱5K) kada usa kagahapong adlawa, adlaw nga Dominggo, Hulyo 12, isip kabahin sa mga benipisyaryo sa SAP kon Social Amelioration Program sa DSWD sa pakig-alayon usab sa DOTr kon Department of Transportation.
Sa tibuok Pilipinas gawas sa Metro Manila, ang Region 12 ang unang nakapanghatag og SAP sa transport sector. Ug sa entiro Rehiyon Dose, Sarangani Province ang unang naapuran tungod organisado ng daan matud pa ang transport group sa probinsya pinaagi sa nag-inusarang provincial transport federation nga gi-organisa ni Governor Steve Chiongbian sa dihang bise gobernador pa kini gitawag nga STARTED o Sarangani Transport Alliance for Reform and True Development.
Nagpadayon pud ning panahuna ang pang-apud apud sa tibuok Sarangani og SAP ngadto sa dul-an Unom ka Libo (<6K) kabuok pamilya ug household. Sila kadtong kwalipikado nga makadawat og SAP sa DSWD atong pirmerong pagpanghatag apan wala matagai bisan pa sa ubang ayuda sa nasyonal nga ahensya sa gobyerno. Gisugdan na kini sa pagpanghatag sa Kiamba kauban ang mga kapulisan.
Taliwala nga adlaw nga Dominggo, anaa mismo nitambong sulod sa Sarangani Capitol Gymnasium sila DSWD Regional Director Cezario Joel Espejo ug LTFRB/Land Transportation Franchising and Regulatory Board Regional Director Renato Padua.
Giubanan sila nila Board Member Arman Guili, ang chairman sa SP Committee on Transportation, Engineer Gerald Faciol, ang assistant provincial administrator, Alabel Mayor Nonoy Salarda ug mga personahe sa transport program ni Governor Solon sila Ms. Merly Nebres ug Sharon Esportuno.
Anaa pud nitambong si Mayor Vivien Yap sa pang-apud apod sulod sa municipal hall sa Glan.
Segun ni Regional Director Padua, ang labaw sa LTFRB Region 12, ang makadawat ang kadtong wala pa matagai ang ilang pamilya sa SAP ug uban pang hinabang sa gobyerno aron dili mag-doble.
Ang ilang gibasehan matud pa ang listahan sa mga taga-Sarangani nga anaa sa Driver’s Academy ug mga pangalan nga gihatag gikan sa mga kooperatiba sa transportasyon ug sa Pantawid Pasada program.
Suportado usab kini nga lakang nila Senador Manny ug Congressman Ruel Pacquiao, Vice Governor Elmer De Peralta, tanang board member ug mga mayores.
Unang nakadawat og Singko Mil ka pesos ang mga pampublikong drayber sa Alabel ug Glan, samtang sa nahabiling lima (5) ka munisipyo sa Sarangani ang posible kining iagi sa Pera Padala ug digital payout aron masunod ang physical distancing ug dili na magpila pa ang mga kaigsoonang driver.
Anaa sa mga saysentos (600) ka mga driver ang target maka-benipisyo sa Sarangani Province.
Matud pa ni DSWD Regional Director Espejo, ang transport group ang apil sa labing naapektuhan sa mga lockdown tungod sa Coronavirus pandemic, maong apil sila nga prayoridad sa panggamhanan ni Pangulong Rodrigo Duterte.
Mapasalamaton si RD Espejo ngadto ni Governor Solon gumikan aktibo ug may kasingkasing matud pa ang Gobernador sa hinanaling pagtabang sa mga nanginahanglan.
Kuyog ang mga mayor, wala matud pa kini nalisdan sa pagpadangat sa mga programa sa DSWD sa mga munisipyo ug kabarangayan.