Cebu News – Dako pa kaayo og bakante ang dose ka district hospital ug upat ka provincial hospital sa Sugbo nga gidumala sa Kapitolyo.
Kini ang gipatugbaw ni Gob. Gwendolyn Garcia taliwala sa pangangkon sa mga tambalanan sa Metro Cebu nga napuno na sa pasyente ang ilang mga higdaanan.
Atol sa iyang regular press conference, gitug-an ni Garcia ang bed capacity sa mga provincial ug district hospitals ug gihimug-atan nga ang admission sa naasoyng mga tambalanan minos kaayo.
Matod ni Garcia, ang matag usa sa maong mga ospital mitagana og 120 ka higdaanan alang sa mga pasyente sa coronavirus.
Segun sa record sa PHO o Provincial Health Office, 32 lang sa maong mga higdaanan ang okupado sa mga pasyente nga naghambin og SARI o severe acute respiratory infection, ILI o influenza-like illnesses ug PUI o persons under investigation.
Sa nasayran, ang upat ka provincial hospital gibahig sa dakbayan sa Danao, Bogo, ug Carcar, ug lungsod sa Balamban.
Ang naasoyng mga tambalanan nag-atiman sa mga pasyente gikan sa amihanan, habagatan ug kasadpan ug kini adunay kapasidad hangtod sa usa ka gatos ka pasyente.