Makanunayon ang pagduyog sa mga opisyales sa probinsya sa Sarangani sa matag tuig nga balaanong kasaulugan sa mga kaigsoonang Muslim sa Eid’l Fitr, ang pagtapos sa usa ka bulan nga sagradong pagtamod sa Ramadan.
Gikasubo sa mga local official nila Governor Steve Chiongbian Solon, Vice Governor Elmer De Peralta, mga board member, mga mayores ug nila Senador Manny ug Congressman Ruel Pacquiao, nga wala nakapahigayon og Grand Iftar o pabuka province-wide una nahuman ang pag-puasa tungod sa nasinatian nga sobra duha (2) ka bulan na nga Coronavirus pandemic. Apan gisiguro niini nga nagpabilin ang ilang hugot nga pagsuporta sa Moro community sa Sarangani Province.
Gani, usa ka semana una nahuman ang Ramadan, nituyok ang mga personahe sa Sulong Kapayapaan program ni Governor Solon aron maka-ayuda og mga sinakong bugas. Tag-usa (1) ka sakong bugas ang gipangtunol sa matag mosque. Tag-duha (2) ka sako kadtong daghan ang mga myembro. Gipakapinan pa kini ni Congressman Ruel Pacquiao og 1,500 kabuok dressed chicken. Adunay dosentos-kwarenta (240) kabuok mosque ang entiro Sarangani.
Si Ustadz Abdulbayan Laguialam sa Madaris for Peace program ang namahayag nga batyag sa iyang mga kaigsoonan ang pagpangga sa mga opisyales ngadto kanila. Matud pud ni Imam Bakar Tondog sa Baluntay, Alabel, sukad kaniadto walay kausaban matud pa ang pagtratar kanila nila Governor Solon.
Sa mga health standard nga gipatuman sa gobyerno, ila matud pang gi-obserba ang physical distancing, limitado nga pagpasulod sa mga nanimba, ug ang pagsuot og face mask. Mapasamalaton usab si Imam Tondog sa lokal nga gobyerno pinaagi sa buhis sa katawhan gumikan nakadawat sila og tag-usa ka sakong bugas singkwenta (50) kilos matag panimalay sa Alabel kadtong wala matagai sa ayudang pinansyal sa SAP, 4Ps, DOLE, ug uban pang ayuda sa gobyerno.
Sa bahin ni Ms. Jennifer Kamid, ang program manager sa Kalinaw Unit, gibutyag niini nga dakog papel ang gihuptan sa mga imam, ustadz ug uban pang Muslim elders alang sa peace and development program ug sa “God-centered Prosperity” vision sa probinsya ug sa mga munisipyo, hilabi na sa hisgutanan nga anti-extremism/radicalism. Sila matud pa ang partner sa LGU sa paghatag og values formation basi sa mga pulong sa Qur-an aron dili sukwahi nga mga pagtulun-an ang makuha.
Sa pagtapos sa usa ka bulan nga pag-fasting, angay lang usab nga alalayan sa LGU ang mga kalihukan sa mga imam ug udtadz. Gi-implementa pud sa mga mosque ug Madrasah Arabic school tibuok Sarangani ang clean-up drive ug disinfection alayon sa health protocol nga gimando sa Department of Health aron magpabiling COVID-free ang ilang tigumanan samtang gapaminaw sa mga maayong pagtulun-an.
Dako na lamang ang pagpasalamat ni Governor Solon tungod nagmalampuson ang usa ka bulan nga pag-obserba sa Ramadan. Sa pagtinabangay sa iyang Governor’s Commission on Muslim Affairs gipangunahan ni Provincial Administrator Mariter Sayson ug sa Kalinaw-Madaris Team, ubay-ubay nga food packs ang ilang nadawat, mga donasyon kini alang sa mga mga ustadz ug Madaris volunteers, gikan sa Dadiangas Halal Catering Services, Katiakap Foundation, Sigay Kauyagan, ug donor-partner nga naka-basi pa sa nasud Singapore nga si Doctora Sitti Maryam Dilanggalen.