Cebu City- Gipahibawo sa Land Transportation Office kun LTO-7 ang paghunong sa operations sa ilang mga buhatan sa dakbayan sa Sugbo ug Talisay sugod kagahapong adlawa, Hunyo 17, hangtod sa sunod nga notisya.
Segun sa advisory nga gi-post Facebook sa LTO 7, ila kining gihimo subay sa IATF-EID Resolution No. 46-A labot sa community quarantine status sa Cebu City ug Talisay City.
Ang mga buhatan sa LTO 7 nga gipaserhan naglakip sa Cebu City Mega Licensing Center, Cebu City District Office, DLRO Robinsons Fuente, DLRO SM City Cebu, Talisay City Extension Office ug Operations Division.
Sa nasayran, gibalik sa IATF o Inter-Agency Task Force for the Management of Emerging Infectious Disease ngadto sa ECQ o enhanced community quarantine ang Cebu City samtang ang Talisay gipaubos sa modified ECQ tungod sa nagsakang mga kaso sa Covid 19.
Samtang ang Mandaue City District Office ug Mandaue City Licensing Center sa LTO 7 gitak-opan usab tungod sa gipahigayong disinfection.