Saysentay Dos (62) kabuok Distress OFW gikan sa pito (7) ka lungsod sa Sarangani ang natagaan bag-uhay lang og tag-Baynte Mil ka pesos (₱20K) matag usa gikan sa OWWA kon Overseas Workers Welfare Administration. Gipangunahan mismo ang pagpanghatag ni OWWA 12 Regional Director Marilou Sumalinog. Rason nga gikalipay kini og dako ni Governor Steve Chiongbian Solon tungod sa paspas nga pag-ayuda.
Personal kining gidawat sa mga benipisyaryo kauban ang mga municipal official sa Sarangani Province, sa pakig-alayon sa provincial ug municipal OFW desk office. Sila kadtong wala nakahuman sa ilang mga kontrata sa gawas sa nasud. Tabang kini aron nga makasugod sila sa ilang panginabuhian sa programa nga Balik Pinas, Balik Hanapbuhay.
Wala pay apil dinhi ang laing programa sa OWWA ug sa Department of Labor and Employment o DOLE alang sa mga Displaced OFW gitawag nga DOLE-AKAP kon Abot-Kamay ang Pagtulong for OFWs. Alang kini sa kadtong namauli tungod sa epekto sa global outbreak sa COVID-19. Sa online mu-apply aron ma-ayudahan sa gobyerno og Dyes Mil ka pesos (₱10K).
Samtang, sa pikas nga bahin, adunay madungag nga 600 kabuok indibidwal ang maka-benipisyo sa programa sa DOLE para sa mga kwalipikadong residente sa Sarangani Province ilalum sa TUPAD kon Tulong Panghanapbuhay sa Ating Disadvantaged/Displaced Workers. Sila ang mahulog nga 4th batch sa mga taga-Sarangani nga masulod sa TUPAD Barangay Ko, Bahay ko/BKBK Project. Ang nakalabay nga tulo (3) ka batch ang libuan pud ka mga Sarangan ang naka-benipisyo.
Sila kadtong wala masulod sa SAP program sa DSWD, 4Ps ug uban pang ayuda sa gobyerno kung diin may madawat sila nga ₱3,260 kada usa. Kini ang gipasalamatan ni Governor Solon ngadto sa DOLE tungod makatabang sa ilang panginabuhian nga labing naapektuhan sa mga lockdown. Sila kadtong mga underemployed, self-employed, home-based workers, vendors ug anaa sa sektor sa transportasyon.