Tagbutyag ni Surigao del Norte Governor Francisco T. Matugas sa interview kuman buntag sa RPN DXKS na mag massive rapid testing an probinsiya aron masiguro na wayay mikanat na COVID-19 sa ato dapit.
Dinhi sa mainland sa Surigao del Norte tagkilaya an duha ka mga testing centers na ipahimutang sa Surigao del Norte Provincial Hospital para sa mga moagi sa checkpoints sa Alegria sanan Claver, sanan sa Eva Macapagal Passenger Terminal Building alang sa mga mosuyod sa syudad agi sa Surigao City Airport, Lipata Ferry Terminal sanan Surigao Port.
Sa Siargao Island, an duha ka testing centers ipahimutang sa Sayak Airport sa Del Carmen sanan sa Siargao Convention Center sa Dapa.
An mga mag positive sa rapid test i-quarantine sa Provincial Community Training Center sa Bad-as, Placer. Jaoy 80 ka kuwarto an tag-andam sa lalawigan para sa ini na quarantine facility. Samtang sa mga mag positive sa Siargao an jaoy duha ka buildings sa Siargao Sports Academy sa munisipyo sa Dapa.
Plano kuman sa probinsiya na ma test an 5% sa populasyon sa Surigao del Norte. Target sa probinsiya na makapalit nan dugang pa na testing kits human midangat an 5,000 ka units na tag order kuman. Nag donar isab an Office of the Civil Defense nan 2,500 units sanan 225 isab an taghatag ni Senador Juan Miguel Zubiri. Paningkamutan sa gobernador na maangkon an 30,000 ka rapid testing kits. Nanawagan siya sa mga mining companies, mga negosyante, mga organizasyon sanan mga adunahan dinhi sa lalawigan na mag sponsor o mo donate nan para ipamalit nan testing kits. Taghangyo isab sa gobernador an katawhan na kon wayay importante na panaw an mag stay at home aron makalikay sa COVID-19. (jc | RPN DXKS)
Note: click the Never Translate to avoid the wrong translation of FB. Thank you.