Cebu City – Gipaubos na sa state of calamity ang mga dapit nga higrabehan sa epekto sa bagyong Vicky sa dakbayan sa Lapu-Lapu.
Giaprobahan sa konseho sa uwahi nilang sesyon ang resolusyon nga nagsabak sa maong deklarasyon.
Kini naglakip sa Sitio Apro, Tacanug Seaside sa Brgy. Ibo; Brgy. Caw-oy, Talima, Tingo ug Tungasan sa Olango Island; ug Brgy. Punta Engaño.
Si Annabeth Cuizon, labaw sa CSWDO o City Social Welfare and Development Office, miingon nga ang tropical depression nakaguba sa 97 ka balay ug 120 ka pambot nga gihapak sa dagkong bawod.
Hinuon, suma pa ni Cuizon, mohatag ang kagamhanang local og financial assistance sa apektadong mga pamilya.
Iyang gitug-an nga ang mga pamilya nga hingpit nawad-an og balay makadawat og ₱ 25 mil samtang sa partially damaged, ₱ 10 mil.
Base sa record, 62 ka balay ang hingpit naguba sa naasoy ng insidente.
Ang kagamhanang local nag-andam na og luna sa Brgy. Canjulao nga kapuy-an sa mga biktima sa bagyo.
Pagkakaron, anaa lang una magpasilong ang mga biktima sa Ibo Elementary School.
(Author and photos courtesy by Jhon Tadlip/JTY)
(Source: Lapu-Lapu City Public Information Office | CSWDO- Lapu-Lapu City)