Iriga City— huli sa padagos na homa kan covid 19 sagkod iba pang mga rason mas kadiit an nagruluwas kasu-odma sa aldaw kan mga puso, imbes an iba nagtiner na sana sa saindang mga harong, ginibo na sanang online an pagbati sa saindang mahal sa buhay.
Ini an pagtubod kan Manager kan sarong food chain sa cuidad nin Iriga, na habu ng magpasambit kan saiyang pangaran, kun sain inako na talagang naghuros nin sobra sa 50% an saindang custumer kun ikokomparar kan nagtalikod na taon asin 75% kan 2019 na dai pa nin pandemya.
Kadaklan sa saindang mga nagin customers mga mag-agom, sinugo sanang magbakal asin mas dakol si nag take out kaysa nag dine-in.
Seguro sigun sa saiya, mas pinagmaray na sa pribado na sanang lugar girumdumon an aldaw kan mga puso O ginibo na sanang virtual an mga pagbati asin paghanap nin elosyon duman sa mga mayo pa nin valentino asin valentina.
Sa lado kan mga hotel, motel asin lodging house, nanotaran na dikit sana an ilinangkaw kan saindang mga customer kun ikokomparar kan nagtalikod na mga taon.
Kaidto kun magigirumduman fully book an gabos na hotel asin mga lodging house sa cuidad bastang minaabot an aldaw kan mga puso, alagad kasu-udma dakol na bakanting kuwarto an tingga asin mayo nin okupante.
Mientras tanto, naghuros man na entero an income ngunian kan mga trimobile drivers sa cuidad nin Iriga. Kulang an nagpahatod, kulang an nag arkila .. ini dara kan mga restrictions na ipinapautob sa kasentrohan kan Iriga huli sa road clearing operations.
Mas pang ikinakahadit kan mga tsuper an liwat na naman na implementasyon kan paghali sa sainda sa tinampo na nakatalaan na orolayan ngunian sa sangguniang panglungsod kan Iriga.
(OIC Melvin F. Barayoga, RPN DZKI)