Padayon ang pag-awhag ni Governor Steve Chiongbian Solon sa tanang katawhan sa probinsya sa Sarangani nga magpa-rehistro sa mobile app nga Stay Safe Philippines (StaySafe.ph). Libre kining ma-download sa Google gamit ang android cellphone.
Ang Stay Safe Philippines ang maoy community-driven contact tracing health condition reporting and social distancing system nga gi-develop sa Multisys Technologies Corporation pinaagi sa ilang CEO and Founder David Almirol Jr. Aprobado kini sa National Inter-Agency Task Force, Department of Health ug sa DICT kon Department of Information and Communications Technology nga ipatuman sa entiro nasud.
Pinaagi niini, personal ug direktang mahibal-an kung adunay sintomas ug nag-positibo sa COVID-19 sulod sa 300 metros gikan sa lokasyon sa nagdala sa cellphone. Masuta kung asang mga lugar niadto ang mga PUM, suspect, probable ug confirmed cases.
Mahibal-an ang adlaw-adlaw nga update kung pila na ka indibidwal ang natakdan sa Coronavirus sa Pilipinas ug sa tibuok kalibutan. Dinhi pud masayran ang mga pahimangno ug anunsyo sa gobyerno. Muhatag kini og paspas nga impormasyon ngadto sa mga opisyales sa LGU ug sa national nga panggamhanan kung unsang buhaton ingkaso may mahitabo nga local transmission.
Natigum na nila Sarangani Provincial Health Officer Doctor Arvin Alejandro ug Assistant Provincial Administrator Engineer Gerald Faciol ang mga myembro sa provincial ug municipal contact tracing team aron ma-orient sa maong mobile app kauban si Mr. Eric Jumilla, ang technical focal person sa Multisys dinhi sa Region 12.
Ang tanang mayor sa Sarangani Province kauban si Governor Solon ang naka-download napud libre sa ilang mga cellphone. Dili kinahanglan nga naka-abri pirme ang internet, i-open lang ang bluetooth sa cellphone og mugana na ang Stay Safe Philippines mobile app.