Gibutyag sa Cebu City PIO nga pahatagan og igong pagtagad ni Cebu City Mayor Atty. Raymond Alvin Garcia ang pag-alima ug pag-ayo sa mga “heritage monument” sa downtown sa downtown nga bahin sa dakbayan sa Sugbo.
Kini ang iyang gipahibalo atol sa graduation ceremony niadtong Oktobre 12, 2024 sa mga sagad kawani sa City Hall nga ni eskuyla sa Heritage Preservation Masterclass nga gipahigayon sa Cultural and Historical Affairs Office (CHAO) sulod sa Rizal Library and Memorial Museum.
Ipaatiman niya og una ang heritage monument sa may Barangay Parian human iyang namatikdan nga kini napasipad-an ug napasagdan hinungdan nga nawagtang ang iyang pagkabililhon sa kasaysayan sa dakbayan sa Sugbo.
Pulong niya, gihimo nalang kining parking-nganan sa truck sa bomber, hinungdan nga nimando siya nga ipabalhin ang mga firetruck sa may Cebu City Medical Center.
“My next directive will be really to maintain or refurbish our monuments in downtown. We will start with the heritage monument in Parian. Sa unang mga panahon daghan kaayong mga firetrucks diha nga naka-desecrate sa heritage monument,” pulong niya.
Gikatakda nga magpagawas si Mayor Garcia og memorandum ning umaabot nga mga adlaw nga nagdili na sa tanang matang sa mga sakyanan nga maka-parking sa palibot sa “heritage monument” diha sa Barangay Parian, ilabi na kay plano niya nga himuon ang dapit nga usa ka maanindot nga suroyanan.
Kagabii, mokabat sa 23 ka mga personalidad ang nakagwadwar sa Heritage Preservation MasterClass nga usa ka programa sa CHAO ug sa CHAC. Sila mao na unyay manguna sa pagpanalipod ug sa pag-amoma sa mga kabilin sa dakbayan sa Sugbo.
“For all our stakeholders in the heritage district, for you now to implement what you have learned. I hope that you actually do this with heart and mind knowing that Cebu City is very rich in history heritage being the oldest city in the Philippines. And in fact, once the first capital of the Philippines,” sulti ni Mayor Garcia kanila.
Atol sa okasyon, gipasalamatan sab niya ang mga commissioners sa Cultural and Historical Affairs Commission (CHAC) sa ilang way puas nga pagpaningkamot aron lang maatiman ang nga dapit sa kabilin ug uban pang mga kabilin sa dakbayan.
Matud niya, karon mao na ang hustong panahon nga ipatuman ang tanang mga ordinansa nga may kalabotan sa kabilin og kultura dinhi sa atong syudad.
Tulo sa mga kalihokan mao ang “Arts Month” nga saulogon matag Agosto, Sugboanong Bahandi Awards, ingon man ang Heritage Awards.
Gani, bag-o lang nga gitapok ang Cebu City Heritage Council human usab na-aprobahan ang Heritage Ordinance duha na ka tuig na ang nilabay. (Renante Socia Lada)
(Source: Cebu City PIO)