Radio Philippines Network
DXDX GenSan News Provincial News

MGA GINIKANAN OG ESTUDYANTE NAGPASALAMAT NAKASULOD SA SARANGANI PAARAL SCHOLARSHIP PROGRAM SA BAG-ONG SCHOOL YEAR

SARANGANI PROVINCE– Tumang kalipay sa mga ginikanan og estudyante sa probinsya sa Sarangani atol sa natigayon bag-uhay lang nga orientation alang sa bag-ong batch sa mga scholar sa PPSS/Paaral kon Paaral Para sa Sarangan Scholarship Program nga mu-eskwela karon nga bag-ong school year 2019 to 2020.

Segun ni Nong Ricardo Catarman, kwarentay-syete (47) anyos, mananagat nga taga-lungsod sa Malapatan, hilabihan ang iyang pagdayig sa pamunuan ni Governor Steve Chiongbian Solon nga matabangan sila nga mga ginikanan nga makahuman og kurso ang ilang anak tungod sa kapit-os sa kinabuhi og dili matud pa permanente ang kita nga iyang makuha sa pagpanagat.

Education ang kurso sa iyang kamagulangan nga 1st year college student karon sa MSU Gensan. Og mas nadasig matud pa kini nga mulampos gayud sa pagtungha ang iyang bata tungod sa presensya og ang gihatag nga inspirasyon ni Governor Solon nga nitambong sa maong orientation sulod sa Kasfala Hall sa Kapitolyo, sa pagsuporta nila Senador Manny og Congressman Ruel Pacquiao, Vice Governor Elmer De Peralta og mga board member.

Samtang, ang batan-on nga si Neil John Ares ang nagbutyag nga dako kaayo ang ikatabang sa allowance nga ilang madawat gikan sa Provincial Government sa Sarangani tungod sa gilay-on sa ilang pamilya. Taga-munisipyo kini sa Maitum maong dili na matud pa sya mamoblema kung adunay mga galastuhan sa iyang pagtungha sa Notre Dame of Dadiangas University sa kurso nga BS Accountancy tungod sa binulan nilang madawat. Mag-uuma ang iyang amahan. Mubalik matud pa kini sa iyang komunidad aron muhatag og serbisyo isip bugti sa pagtabang sa probinsya ngadto kaniya.

Gidayig niini ang liderato ni Governor Solon tungod kay gawas sa paghatag og dakong atensyon sa edukasyon sa kabataang Sarangan hilabi na sa mga naglisod, daghan usab matud pang mga kaayuhan ang gi-ayuda sa Kapitolyo alang sa ilang lungsod sa Maitum nga ilang madunggan pirme sa mga pagpamulong sa ilang mayor nga si Mayor Bryan Reganit. Daghang kalambuan na matud pa ang makita karon sa ilang lugar.

Sa bahin sa Gobernador, iyang gidasig ang mga kabataan nga humanon ang pag-eskwela og dili sayangan ang higayon. Nanginahanglan matud pa ang Sarangani Province sa daghang professionals aron maoy mudala sa kinatibuk-ang tinusbawan og kalambuan.

Daghang kaayuhan matud pa ang gihatag karon sa mga professional gikan sa Duterte Administration nga siguradong dakong ikatampo sa pag-umento sa kinabuhi sa ilang mga pamilya.

Sa talaan sa opisina ni Ms. Glenda Revaño gikan tuig 2013 pagsugod sa Sulong Karunungan program, niabot na sa 111 kabuok ang nipasa nga mga magtutudlo sa LET exam nga gikan sa Paaral, 22 ka Civil Service Professional passer, walo (8) ka CPA, lima (5) ka electronic, agricultural og civil engineer, duha (2) ka magna cum laude, 31 ka cum laude, og ubay-ubay nga mga agriculturist, social worker, custom broker, midwife, criminologist, nurse og fishery technologist.

 

(Photos: Jake Narte, Maam Revano)

Related posts

Dep-Ed Iriga Padagos Sa Pag-Ako Nin Late Enrollees

RPN

City Hall Dili Mobalibad Sa Mga Returning OFWs

RPN

Shooting Incident At Purok 2, Brgy. Buayan, Kabasalan, Zamboanga Sibugay Province

RPN