Mipabati sa ilang dakung pagpasalamat ang mga kwalipikadong nakadawat sa Social Amelioration Fund (SAF) nga tag singko mil ka pesos (P5,000.00) gikan sa lain-laing barangay ning dakbayan, ilawom sa unang hugna o 1st batch nga gipahigayon karung adlawa, Abril 27,2020 didto sa Plaza Magsaysay, ning dakbayan.
Nasayran nga kining maong gilugway nga ayuda ubos sa Social Amelioration Program (SAP) sa nasudnong buhatan sa Department of Social Welfare and Development (DSWD) alang ngadtong nanginahanglan nga pamilya o giilang “ poorest of the poor” aron sa pagtubag sa pipila nila nga mga panginahanglanon panahon ning hulga sa COVID-19 sa nasud.
Matud pa sa usa ka benepisaryo nga si Jorie Flores Almudal, 34 anyos, taga San Jose ug usa ka tricycle driver, nalipay ug mapasalamaton kini sa nadawat nga hinabang diin matud pa niya, nga usa na ka bulan na siya ga-antos kauban sa iyang pamilya nga walay ‘kita’ sa iyang panginabuhian ug tungod sa nadawat nga ayuda, makapalit na gayud siya ug bugas ug sud-an para sa iyang pamilya.
Atol usab sa pakighinabi ngadto ni Juanito Lunjas, taga Sinaman , usa ka senior citizen, mipabati usab kini sa iyang dakong kalipay tungod sa nadawat nga hinabang nga makatabang gayud sa iyang galastuhon ilabina sa iyang mga gikinahanglang tambal.
Samtang , si Mesario Carmelita Fuentes, 48 anyos, taga Cogon usa ka inahan ang mapasalamaton usab sa nadawat nga grasya tungod kay aduna na siya’y ikapalit nga pagkaon sa iyang pamilya nga halos naglisud na siya ug pangita ug kwarta aron sila makaka-on ug tarong.
Sigun sa nasayran nga ang pagpapahigayon sa unang adlaw alang sa pag-lugway sa SAF, ang dinuyogan sa hugot nga pagbantay sa mga puwersa sa kapulisan, PNP Maritime Zamboanga Del Norte, 51st Infantry Battalion, Philippine Army ug mga barangay tanod inubanan sa pipila ka mga kawani sa City Government alang sa pag ‘assist’ sa mga resipiyente dinha sa pagkobra sa Social Amelioration Fund . Nahimo kining malinawon ug matinud-anon usab nga misagop sa usa ka metros nga social distancing ug pagsuot ug face masks.
Nasayran nga ang pagpang-apud-apud nagapadayun alang sa mga kwalipikadong resipiyente ug na-obserbahan nga nahimong hanoy ug hapsay ang maong kalihukan gumikan kay misanung ang tanan sa mga gabayan nga gi-obserbahan.
Matud pa ni Assistant CSWD Officer, Jovencia Orilla tungod sa hapsay ug paspas ang pagproseso sa SAF ‘pay-out’, gawas sa pito ka mga barangay sama Diwan, Cogon, San Jose, Sangkol, Punta, Gulayon ug Sinaman lakip usab nahatagan ang uban pang mga kwalipikadong resipyente gikan sa Central, Barra, Estaka, ug Turno nga gikalatid nga mahatagan karong umaabot adlaw’ng Miyerkules ug Huwebes aron sa pagpahimulos sa panahon.Dugang pa niya nga ugmang adlawa ipadayon gihapon ang pagpanghatag sa maong ayuda hangtud mahuman na ang pakobra sa tanan lakip na sa mga kwalipikadong resipyente sa Barangay Minaog.
Kahibaloan nga ang buhatan sa City Social Welfare and Development Office (CSWDO ) ug DSWD nga mga personahe nangandam alang sa ikaduhang batch nga ‘pay-out’ sa maong ayuda ug ipahibalo ra unya ug unsa kaayo nga mga barangay ang mahatagan.
