Cebu City – Giila sa PRC o Professional Regulation Commission ang usa ka medical school nga nagbase sa Sugbo isip top-performing school sa PLE o Physician Licensure Examinations.
Gipagawas sa PRC ang resulta sa PLE kagahapon diin usa ka gradwado sa University of the Philippines o UP Manila ang nag-una.
Si Jomel Garcia Lapides ang na-top sa grado nga 88.67 porsyento.
Bisan kon walay usa sa mga gradwado sa Sugbo nga naapil sa top 10 apan ang 138 ka examinee gikan a CIM o Cebu Institute of Medicine pulos mingpasar.
Ang UP Manila ikaduha sa top-performing school sa nasud diin sa 146 nga mikuha, duha ra ang nahagbong ug ang Ateneo School of Medicine and Public Health ang ikatulo kay sa 143 nga mi-take, 141 ang nakapasar.
Ang ubang Top 10 performing medical schools mao ang Pamantasan ng Lungsod ng Maynila, University of Santo Tomas, University of the East, Ramon Magsaysay Memorial Medical Center, Far Eastern University – Nicanor Reyes Medical Foundation, San Beda University, Saint Louis University ug Davao Medical School Foundation.
Suma pa sa PRC, 3,538 gikansa 4,704 nga mikuha sa pasulit pagka doctor ang nakalusot. (Jhon Tadlip/JTY)
(Source & photo courtesy of Professional Regulation Commission)