Pormal nga gisubhan kaniadtong Pebrero 18, ang 2-storey building nga Municipal Disaster Risk Reduction and Management Office (MDRRMO) ug Operation Center sa lungsod sa Mutia.
Kini nahimo ilawum sa pagdumala ni Mayor Lorrymir Adasa, sa kantidad nga P2,487,600.50 gikan sa pahat sa 5% Local Disaster Risk Reduction sa kagamhanang lokal sa Mutia.
Si Atty. Goldie Love Poculan-Gonzales, ang OIC sa Provincial Tourism Office ug Provincial Information Center kinsa nagrepresentar ni Governor Uy, sa iyang mensahe ang mipahalipay sa administrasyon ni Mayor Adasa gumikan sa pagtukod sa maong edipisyo.
Giawhag usab niya ang katawhan nga aron makatabang usab sa gobyerno kinahanglan magtanum ug kahoy aron malikayan ang baha ug landslide.
Dugang ni Atty Gonzales nga kinahanglan usab mangandam alang sa bisan unsang kalamidad nga muabot. Sama sa sunod-sunod nga nahitabo karon sa nasud, ang pagbuto sa Taal Volcano, linog ug baha.
Samtang sa nasud sa Australia mao ang pagkasunog sa lasang.
Si Atty Gonzales mitapos sa iyang mensahe pinaagi sa pagpabilin sa panultihon ni Benjamin Franklin nga “By failing to prepare, you are preparing to fail”.
Samtang si Mayor Adasa ang nagkanayon usab nga ang MDRRMO building ug Operation Center alang kini sa pagpangandam kung adunay kalamidad sanglit ang Pilipinas duol sa kalamidad sama sa nahitabo karong bag-o.
Gipamahayag sa mayor nga kining maong proyekto, sugod pa lamang kini alang sa maong katuyuan.
Gilaraw ni Mayor Adasa nga ipaabot kini sa kabarangayan sanglit dali nga mag landslide ang pipila ka barangay sa lungsod sa Mutia.
Si Mr. Edwin Bation, ang OIC sa MDRRMO ang nagkanayon usab nga ang Command Center 24 oras kining mag-operate aron maka-responde gilayon sa emerhensiya.
Nagpasalamat usab siya nga ang maong building magamit na kini aron makaapil na unya sila sa Gawad Kalasag Award ug sa Seal of Good Local Governance (SGLG) Award.