Disiplina, Kooperasyon ken naan-anay a pannakaawat dagiti umili ti ili a Burgos ti nangitunda iti pannakamentener ti ili nga awan pay ti nagpositibo ti COVID-19.
Daytoy ti pammati ni Mayor Cresente Garcia ti nadakamat nga ili a nangitunda iti panagtalinaed ti Burgos a “COVID-19 Free”.
Malaksid iti daytoy, imbatadna a daytoy ket gapu iti kinagaget dagiti Barangay officials a mangipatungpal kadagiti protocol ken pagannurutan iti pananglaban ti COVID-19.
Kabayatanna, impalgak ti mayor a babbalakadanda dagiti Locally Stranded Individual ken dagiti Returning Overseas Filipino a sakbay nga agawidda ket masapul a dumalanen dagitoy iti “swab test” tapno awan ti agbalin a tubeng iti panagawidda.
Kunana a babaen iti daytoy ket napinpintas pay ti Sistema ti pannakamonitor dagitoy.
Mainaig iti daytoy, ginutigotna dagiti barangay officials, dagiti kameng ti Phil. National Police, Bureau of Fire Protection ken dagiti empleyado a saan a mangisayangkat iti aniaman nga okasyon.
Mangnamanama ti mayor a babaen iti agtultuloy a napintas a panagtitimpuyog da iti ili a Burgos ket mapagtalinaed ti ilida a COVID free iti agdama a tawen 2021.
(Irene Ringor, RPN DZRL Batac Correspondent)
(Source: Provincial Government of Ilocos Norte)