Iriga City – Ini an hatod na mensahe kan local na gobierno kan Baao, Camarines Sur matapos na ilansar ngunian na aldaw an “QuaranTanim Seedling Caravan” tanganing mataw’anan nin pagkakataon an gabos na namamanwaan na paramientras na yaon sa saindang mga harong huli sa pandemya, mas maray na magtanom nin gugulayon, fruit bearing trees, ornamental plants asin iba pa na papakinabangan kan bilog na pamilya.
An caravan, dara kan Municipal Agriculture Office asin kan Farm Ready Seedling Corporation sa koordinasyon ni alcalde Jeff Besinio sa pagtubod na dapat mamantiner na produktibo an pagbuhay kan mga namamanwaan maski entering nasisibot sa paglaban kan covid-19. Kadaklan sa mga pananom, ini makakatabang pa nganing magkaigua nin maray na nutrisyon an bilog na pamilya asin income na magiging tabang sa saindang pagbuhay. (Melvin F. Barayoga, RPN DZKI Iriga OIC)
(Source: LGU Baao, Camarines Sur)