Napalgan sa kalubihan sa bukid nga erya didto sa Sitio Legaspi, Purok Ilang-Ilang, Brgy. Magsaysay, Placer, Surigao del Norte ang patay’ng lawas sa mag-uuma niadtong Domingo, Hulyo 19 human nga gitaho ni SB Member Allan Turtur sa kapulisan mga alas 4:30 sa kahapunon.
Naila ang biktima nga mao si RONALD OCMAR BALLERA, 38 anyos, minyo, ug lumulupyo sa Purok Ilang-Ilang, sa nasampit nga barangay.
Sa gihimong inisyal nga imbestigasyon, nasayran nga niadtong Hulyo 6 miadto ang biktima sa bukid nga erya aron mag-uling apan sukad niadto ang wala na makauli sa ilang panimalay, hinungdan nga giadto na sa pamilya ang maong lugar ug didto napalgan ang biktima nga gilubong sa wala pa mailhing (mga) suspetsado diin nakaangkon ug samad hiniwaan sa liog ug sa tuong paa ug giputol ang lawas sa makaduha. Ang coconut farm gipanag-iyahan ni Al Sumayangin.
Narekober sa crime scene ang usa ka mahait nga bolo. Ang patay’ng lawas sa biktima gikuhaan na ug post mortem examination ni Dra. Rachelle Jean Sanchez, ang Municipal Health Officer sa RHU Placer.
Mihimo na ug makuting imbestigasyon ug follow-up operation ang Placer Municipal Police Station alang sa pag-ila ug posible nga ikasikop sa nagabuhat sa krimen. (Jun Prex Salubre, Ronda 6 RPN DXKS)
Pictures courtesy of Placer PNP