Naiget a pannakaipataw iti multa dagiti matiliwan nga aglabsing kadgiti paglintegan nga inyetnag ti gobierno nasional kangrunaan iti panagusar ti facemask ken social distancing nga epektibo nga wagas a panglaban iti novel corona virus disease.
Daytoy ti impasingked ni Police Major Rely Layug, pannakangiwat ti Ilocos Norte Police Provincial Office iti Camp Valentine S. Juan.
Inlawlawagna a saan nga ang-angaw ti saan a panangusar kadagiti nasao a paglintegan tapno maliklikan iti mabalin a pannakaakar ken panagwaras iti COVID-19 Pandemic.
Nupay kasta, kuna ni Layug nga awan pay ti natiliwan a anglabsing iti saan a panagusar ti facemask ken social distancing.
Kunana nga agpapada pay laeng a warning wenno pammalagip kadagiti immunan a nasiiman nga awan iti suot a facemask ngem adda iti bulsada.
Inadmitir ni Major Layug nga adu latta dagiti natangken ti ulona ken narigat a makaaw-awat iti apela ni Ilocos Norte Gob. Matthew Marcos Manotoc iti panangsurot kadagiti paglintegan.
Iti baet daytoy, kunana a nu mairasunan ti natiliw a nalipatanna nga insuot ti facemask na nga adda laeng iti bulsa na, mabalin mapakawan ngem no awan ti maipakitana a facemask, masapul a matiliw ken agmulta tapno agnakem dagitoy.
Innayon iti pannakangiwat ti Ilocos norte Police Provincial Office a sipud naiyimplimentar ti Enhanced Community Quarantine, kasapulanen ti agusar iti facemask ken no awan ket saan laengen a rumrumuar iti uneg ti pagtaengan.