Bimmisita ti lima a “beauty queen” ken Sumagmamano a “social media influencer” ditoy pagilian idiay Umok ni Siwawer Eco Tourism Park idi Domingo Mayo 16.
Siraragsak a pinasangbay ni Mayor Larisa C. Foronda ti nadakamat nga ili dagiti nadakamat a bisita.
Naammoan a karaman ditoy da Miss Angelia Ong, Miss Earth 2015; Celeste Cortesi, Miss Earth Philippines 2018; Janelle Tee, Miss Earth Philippines 2019; Roxie Baeyens, Miss Earth Philippines 2020 ken ni Ms. Patricia Tumulak, Bb. Pilipinas alumni ken iti agdama ket maysan a TV host ken artista.
Pinangaldaw ti mayor dagiti nadakamat a bisita iti siruk dagiti nalamiis ken narukbos a kaykayo nga adda iti asideg dagiti cottages.
Mainaig iti daytoy, mangnamnama ni Gob. Matthew Marcos Manotoc ken ni Mayor Foronda a ti iyuumay dagiti nadakamat a beauty queen ditoy probinsia ti mangitag-ay iti turismo ditoy probinsia ken umadu dagiti turista nga agturong idiay Umok ni Siwawer Eco Tourism Park.
Naammoa a binayabay ni Mr. Erwin B. Suguitan, Tourism Operations Officer II ti LGU Vintar dagiti bisita a nangipadas kadagiti maididiaya iti Siwawer kas iti bikeline, zipline ken dagiti dadduma pay a pasilidad.
(Ronald Domingo, RPN DZRL Batac Correspondent)
(Source: Provincial Government of Ilocos Norte)