General Santos City — Hospital ang gidangatan sa usa ka Glenn Paul Pagas Jurane, 28 anyos, nga nanimuyo sa Sunrise Subdivision Prk 23, Barangay Lagao ning syudad human nga gipusil kini sa iyahang silingan nga si Eutiquio Llanto, 60 anyos, nga nanimuyo usab sa maong lugar.
Sumala pa ni PCI Peter Pinalgan Jr. ang hepe sa Police Station 3 nga nahitabo matud pa ang pag pamusil alas 12:00 ang takna sa tungang kagab-ihon sa susamang lugar human nga gialigaran sa suspect nga gibato sa biktima ang iyahang panimalay.
Nasayran nga nag-inom matud pa sa maong lugar ang biktima uban ang iyahang ig-agaw ug kalit lang migawas ang suspect dala sa iyang armas ug gikompronta ang duruha ka naginom ug didto nahitabo ang pag pamusil.
Sa kasamtangan nagpadayon matud pa ang gihimong hot pursuit operation sa Police Station 3 batok sa suspect nga si Llanto human nga paspas kining misibat pahawa sa maong lugar gamit ang iyang motorsiklo.
Giandam naman usab karon sa kapulisan ang tukmang kaso batok sa nasangpit nga sa kasamtangan nag tagoan pa sa balaud.
Nagpalaim nalang usab karon sa balay tambalanan ang bitktima nga si Glenn Paul human nga nakaangkon ug usa ka samad sa iyang abaga.