Cagayan de Oro City – Gilantaw ang pag-operate sa laing major telecommunication company sa dili madugay dinhi sa dakbayan sa Cagayan de Oro. Kini tapos ang Vertiv Philippines, Inc nagpahibalo kang Vice Mayor Raineir Joaquin Uy pinaagi ni City Councilor Teodulfo Lao, ang chairman sa committee on Public Utilities sa konseho ning syudad sa plano sa pagconstruct sa Edge Modular Data Center sa syudad alang sa DITO Telecommunity Corporation.
Ang DITO mao ang pinakabag-ong telecommunications provider sa nasud. Base sa report, ang consortium naka-commit pagserbisyo sa 37% sa populasyon ug paghatag kaabante ngadto na sa 27 MPBS sa ilang unang tuig sa operasyon. Kini nga telco nagtinguha paglusad sa ilang negosyo sa Marso 2021, segun sa nahipos nga taho.
Sa ilang sulat, si Vertiv Project Director Selva Subramanlam nagsugilon nga ang ilang kompaniya nagtinguha nga sila mahatagan sa gikinahanglan nga mga permits ug clearances aron sa pagtukod sa maong data center ug uban pang susamang mga kalihokan dinhi sa dakbayan. (Sangguniang Panlungsod)