Aksidenteng nadasmagan ug motorsiklo ang laborer dili pa lamang dugay didto sa National Highway, Purok 1, Brgy. Upper Libas, Taganaan, Surigao del Norte nga mao si ROGETO ABUEVA EBUÑA, JR., 34 anyos, ulitawo, ug lumulupyo sa Purok 3, sa nasampit nga lugar.
Samtang ang itom nga Mio Sporty nga aduna’y temporaryong Plate No. 150105 ang gimanihoan ni FRANCISCO SINDOL MALIG-ON, 36 anyos, aduna’y katibo, panday ug lumulupyo sa Revcor Village, Brgy. Luna, dakbayan sa Surigao.
Nasayran sa inisyal nga imbestigasyon nga ang motorsiklo nagdagan gikan sa Bad-as, Placer paingon unta ug syudad apan paghidangat sa Purok 1, Brgy. Upper Libas aksidenteng nadasmagan ang biktima nga milabang sa dalan.
Nakaangkon ug injury ang driver human natumba sa dalan ang motorsiklo ug pareho silang gidala sa Caraga Regional Hospital pinaagi sa ambulansya sa Taganaan Rural Health Unit.
Ang motorsiklo ubos na sa kustodiya sa Taganaan Municipal Police Station.
(Jun Prex Salubre, Ronda 6 RPN DXKS)