Cebu City – Mi-file na pod og tulo ka semana nga medical leave si Cebu City Mayor Edgardo Labella kay kinahanglan siyang maulian sa hingpit sa iyang balatian.
Atol sa press conference, gipahibawo ni Labella nga iyang gitudlo si Vice Mayor Michael Rama isip acting mayor sugod karong adlawa.
Agig reaksiyon, gipasalig ni Rama ang pakighugoy kang City Administrator Floro Casas Jr. aron segurong hapsay ang pagpadagan sa City Hall.
Giasoy ni Labella nga niadtong Enero gida siya sa ospital tungod sa ear infection apan dili diay kadto ra.
Samtang nagpabilin siya sa ospital diin gihimo ang dugang test, gisultihan siya nga aduna siyay sepsis o blood infection.
Gawas sa sepsis, na-diagnose usab si Labella nga adunay slight pneumonia.
Gisugyot sa doctor ang pipila ka buwan nga bakasyon apan mibalibad siya tungod sa matod pa, various unfinished businesses sa City Hall. (Jhon Tadlip/JTY)
(News & photo courtesy of Cebu City Public Information Office)