Gisikop sa mga personahe sa Surigao City Police Station ang suspetsado sa kawat nga si Helario Ruizo, 29 anyos, ulitawo, baggage attendant sa Metro Surigao Shopping Center, nagpuyo sa Purok-6 Brgy. Valencia, Cagdianao, isla sa Dinagat human siya nasayran nga maoy mikuha sa kwarta gikan sa backpack nga gibilin diha sa baggage center/counter sa nahisgutang establisyemento Enero 20, 2019.
Sumala sa imbestigasyon ni PO3 Rex Plaza, nga sa may alas 4:15 an takna sa kahapunon, ang biktima o complainant nga si Gilmae Dugenio, 19 anyos, sales lady sa Surigao Royal Hardware nga nagpuyo sa Brgy. Serna, uban sa iyang live-in partner, misulod sila sa Metro Surigao aron mamalit, ug iyang gi-deposito ang iyang backpack sa baggage counter.
Sa ilang paggawas human nila pag-claim sa iyang gibilin nga backpack iyang na-diskubre nga nawagtang ang iyang kwarta kantidad Php 700 nga gibutang sa atubangan nga bulsa sa backpack mao nga mi-diresto sila sa pag-report sa Surigao City Police Station ug girespondihan nila SPO4 Andres Espina ug PO3 Robert Fijo uban sa complainant sa mao nga establisyemento.
Ilang gilantaw ang CCTV footage, ug didto ilang nakita nga ang nahisgutang baggage boy nga mikoot sa backpack ug gikuha ang kwarta nga mi-resulta sa pagsikop sa suspetsado ug anaa na karon ubos sa kustodiya sa Surigao City Police Station.