Zamboanga del Sur – Mag-atubang nasab og laing 60 ka adlaw nga preventive suspension si Kumalarang Mayor Ruel “Balong” Molina tungod sa kasong ABUSE OF AUTHORITY ug MISCONDUCT IN OFFICE nga gipasaka batok kaniya sa hawanan sa Sangguniang Panlalawigan.
Ang suspension order nga gipagawas ni Gov. Victor J. Yu nga dunay petsa nga July 19, 2021 nag-ugat sa administrative case nga gipasaka batok kang Molina human iyang gikuha ang usa ka empleyado sa sangguniang bayan isip HRMO ug gibalhin sa buhatan sa local chief executive. Matud ni Atty. Banjo Cordero, dunay legal opinion ang Department of Interior and Local Government sa maong lihok ni Mayor Molina ug dako kining sayop sumala sa Local Government Code.
Ang preventive suspension order usa ka lakang aron mapugngan ang respondent nga si Molina sa pag-impluwensiya sa integridad sa mga records, ebidensya, ug mga testigo samtang nagpadayon ang pagdungog sa kaso.
Kahinumdoman nga miagi usab ug 2-months preventive suspension si Molina ning milabayng tuig sa usa ka administrative case ug 6 ka bulan nga suspension isip penalty human nahukmang guilty sa kasong abuse of authority.
(News & photo courtesy of Victory Zamboanga del Sur)