Cagayan de Oro – Ipahigayon sa City Central School ning syudad ang katapusang duha ka ‘Klarex nga Serbisyo sa Baryo’ program ni Mayor Rolando ‘Klarex’ Uy karong umaabot Nobyembre 18 ug Nobyembre 25 alang sa mga katawhan sa urban barangays sa Cagayan de Oro.
Sa flagraising ceremony sa city hall niadtong Lunes, gipahibalo ni City Administrator Atty. Roy Hilario Raagas nga ang KSB karong Sabado, Nobyembre 18 gitagana alang sa mga residente sa Barangay 1 hangtud Barangay 20, samtang ang KSB sa Nobyembre 25 alang sa mga molupyo sa Barangay 21 hangtud Barangay 40.
Nag-unang highlight sa ‘Klarex nga Serbisyo sa Baryo’ ang pagkasal ni Mayor Klarex sa mga magtiayon nga nagpuyo-puyo na sulod sa pila ka katuigan atol sa ‘Kasalan ng Bayan’, diin makadawat ang matag magtiayon og libreng lechon, cake, wine, bugas ug assorted groceries gikan sa buhatan sa mayor, Majority floor leader Ed Cabanlas, City Councilor Alam Lim ug City Councilor Roger Abaday.
Tipik sa mga batakang serbisyo nga libreng mapahimuslan sa mga katawhan mao ang pag-ibot sa ngipon, paghiling sa balatian kon medical check-up, tambal ug medisina, paglukat sa mga dokumento sama sa business permit, cedula, electrical, building permit, pagbakuna sa mga hayop, paghatag og mga binhi sa prutas ug utan, pagrehistro sa pagkatawo, masahe, alot ug daghan pang uban.
News and photo courtesy of Cagayan de Oro City Information Office