Padayon pang gihulat karon sa General Santos City Police Office ang resulta sa paraffin test sa gitudlong suspek sa pagpusil-patay sa Brigada executive nga si Yen Abedo-Quintoy.
Matod pa ni GSCPO chief, P/Colonel Gilberto Tuzon, positibong nailhan sa usa ka testigo ang suspek nga giilang si Ralph Gerald Sorabia, security admin officer sa Global Dynamic Security Agency.
Una nang gikataho nga adunay nahitabong “personal and office work issues” tali sa suspek og sa biktima, diin maoy nakitang motibo sa krimen.
Kasong murder ang giandam karon batok sa suspek.
“The witness had personally identified the suspect of the said shooting incident through a gallery of random photos presented it was also documented through video recording while being accompanied by his parents as the witness is still a minor,” ang tipik sa gipagawas nga pamahayag sa GSCPO.
Si Yen ang gipusil niadtung miaging semana, samtang kini pauli na unta sa panimalay.
Una nang mitanyag og P1-million nga reward si Brigada president ug chief executive officer Elmer V. Catulpos sa kinsa mang makahatag og impormasyon nga makatabang aron madakpan ang mga responsable sa maong krimen.
Ang Global Dynamic Security Agency ang gipanag-iyahan usab sa Brigada.
Kahibaluan usab nga mismong si PNP chief, Gen. Guillermo Eleazar ang nagmando sa PNP-Regional Office 12 ug GSCPO nga tutukan ang Quintoy murder case. (John Rey Somido)