Cebu City- Mahimo nang makasimba ang mga Sugboanon sa probinsiya sugod karong Domingo, Hunyo 7.
Kini ang nalatid sa Executive Order o EO 17-F nga giluwatan ni Gob. Gwendolyn Garcia.
Una niini, gipahibawo ni Cebu Archbishop Jose Palma nga andam na ang mga simbahan sa pagpahigayon og misa apan pabiling magtamod sa mga health protocol ubos sa GCQ o general community quarantine.
Sa nasayran, ang lalawigan sa Sugbo, ug ang pipila ka dapit sa nasod, gipaubos sa GCQ sukad niadtong Mayo 16.
Matod ni Garcia, kusganon nilang gidasig ang pagpahigayon sa mga religious gathering sanglit gawas sa physical ug mental health, gikinahanglan usab sa tawo ang spiritual health.
Hinuon, subay sa protocol, kinahanglang katunga lang sa kapasidad ang manambong sa misa.
Gawas niana, magtamod gihapon sa social distancing, pag-disinfect sa kaugalingon, pagsul-ob og face mask ug uban pa.
Nasayran nga aduna nay mga simbahan nga nangabli ug hugot nga nagpatuman sa social distancing, gisusi ang temperatura sa mga manimbahay ug gipahunaw sa alcohol sa dayong sulod.