Mokapin sa duha ka libong mga tawo sa Cagayan de Oro ug Misamis Oriental ang nahasukip sa listahan sa mga way trabaho resulta sa mando ni Presidente Duterte sa pagsira sa tanang tayaanan nga akreditado sa Philippine Charity Sweepstakes Office.
Matud pa ni Astrid Jose Bana, presidente sa MisOr-CDO Lotto Agents Association nga ang nasangpit nga gidaghanon gibase sa kapin usa ka libo nga PCSO-accredited outlets dinhi sa CDO ug MisOr diin gibanabana nga adunay tag 2 ka tawo matag outlet.
Gidugang pa ni Bana nga samtang suportado nila ang kampanya batok korapsyon apan malauman sila nga mausab pa niini ang desisyon nga tugtan nga mahibalik ra ang numbers game sa PCSO.
Sa tibuok rehiyon 10, adunay 1,900 ka mga lottery betting stations ang napasirad-an na sukad niadtong adlawng Sabado, sumala sa pinakaulahing report nga gipagula sa Camp Alagar spokesman Lt. Col. Mardy Hortillosa.