Tagpasabot ni Vice Governor Eddie Gokiangkee, Jr. na jaoy gajod epekto sa industriya sa turismo dinhi sa probinsia an inin sitwasyon kuman sa nasud na jaoy dako na kahadlok sa Novel Corona Virus.
Bisan gani matud pa an mga polisiya kuman na tagpa implementar para na dili maka suyod an tagkahadlukan na virus sa ato lugar, pareho nan temporaryo na pagdili sa pagdawat nan mga turista gikan China na tagmandar nan kagamhanang probinsial may epekto sa industriya na turismo labina didto sa isla nan Siargao.
Pero tagsulti ni Gokiangkee na inin tanan temporaryo lamang sanan mas gamay an kadaot kun may man ikumparar pananglit may mahitala na kontaminasyon bisan hain dinhi sa probinsiya.
Tagsulti isab nan bise gobernador samtang waya pay deklarasyon an DepEd sanan an kagamhanang probinsial kabahin sa umaabot na pagpahigayon sa Caraga Regional Sports Competition didto sa isla nan Siargao, na tagtawag na Island Games, may mga coordination meeting na an mga kadagkuan para sa luwas sanan hapsay na pagpahigayon sa naasoy na event labi na sa inin sitwasyon kuman sa kahadlok sa 2019 novel corona virus. (Jhino Parrucho, Ronda 10 RPN DXKS)