Laraw karon nga muhatag og dugang ayuda si Pres. Rodrigo Roa Duterte ngadto sa Kagamhanang Lokal sa Dipolog pinaagi sa pagpadala og dugang mga bakuna aron mapalapdan pa ang “local vaccination” dinhi sa syudad sigun sa nahitabong “teleconference call” kaniadtong Hunyo 13, adlaw’ng Domingo, ning tuiga sa may alas-9:00 ang sa kagabhion.
Ang maong “teleconference” ang gihimo ni City Mayor Darel Dexter T. Uy, kinsa misaysay ngadto kang Pres. Duterte sa kasamtangang kahimtang dinhi sa dakbayan atol sa nagpadayon nga pandemya uban sa presensya nila ni Senator Christopher Lawrence “Bong” Go, Department of Health (DOH) Secretary, Dr. Francisco T. Duque III ug Vaccine Czar Secretary Carlito G. Galvez Jr.
Sigun sa pagpakig-hinabi ngadto kang Mayor Uy, nabalaka siya sa kasamtangang kahimtang ning siyudad kalabot sa COVID-19 hinungdan nga nangayo siya og tabang ngadto sa Nasudnong Kagamhanan pinaagi sa pagkontak ni Senador Go, kung diin nakigpulong kini uban ni Pres. Duterte, Sec. Galvez ug Sec. Duque aron mahatagan og pagtagad ang maong mga tinguha.
Gisaysay usab ni Mayor Uy nga andam nga mutabang si Pres. Duterte sa pagpangita og mga pamaagi nga madugangan ang mga nurses ug “health experts” dinhi sa Dipolog. Dugang pa niya, nagpasalamat siya sa suporta nga nadawat sa Kagamhanang Lokal gikan sa Malacañang ilawom sa liderato ni Pres. Duterte ug sa gabinete niini, dinha na sa paghatag nila og pagtagad alang sa kaayohan sa nasangpit nga siyudad.
Ang Mindanao karon ang matud pa nagbaton sa nagkataas nga kaso sa COVID 19, diin nahilakip kini sa prayoridad, lakip na kining atong dakbayan nga mahatagan sa dugang mga bakuna, alang sa pagpadali sa atong “local vaccination program”.
Subay niini, nasayran nga ang unang “batch” sa mga bakuna nga gipadala gikan sa Malacañang alang sa siyudad sa Dipolog ang gikatahong moabot ugmang adlawa, Hunyo 15, 2021. (City Information Office-jnp)