Cebu City- Gibutyag ni Mandaue City Mayor Jonas Cortes ang iyang tinguha pagmontar og bike lanes o agianan sa bisikleta sa palibot sa siyudad alang sa kasayon ug kaluwasan sa mga bikers.
Sa post sa Facebook sa PIO o Public Information Office, bisan niadtong wala pay coronavirus disease o Covid 19, nagplano na si Cortes pagbutang og dan sa bisikleta sa mga karsada sa Mandaue.
Sumala pa sa pangu sa PIO, Atty. John Eddu Ibañez, nakonsulta na sa mayor ang city planning officer ug gimandoan pag-ila sa mga lugar nga angayng butangan og bike lanes.
Matod ni Ibañez, unang gilarawng butangan og agianan sa bisikleta ang dagkong dalan sa amihanan ug habagatan lakip sa brgy. Centro.
Ang naasoyng lakang nahasubay usab sa mando sa DILG o Department of Interior and Local Government sa tanang LGUs pagbutang og bike lanes sa ilang dapit.
Sa nasayran, nauso ang pagbisikleta dihang naundang ang biyahe sa mga pasaheroan tungod sa pagpaubos sa mga dapit sa ECQ o enhanced community quarantine o lockdown aron dili makapatuyang pagkatap ang coronavirus pandemic.