Ginawang quarantine facility ng lokal na pamahalaan ng San Juan ang isang eskwelahan sa lungsod para sa mga persons under investigation (PUI) sa sakit na coronavirus disease 2019 (COVID-19).
Ayon kay Mayor Francis Zamora, ang bagong building ng San Juan City Science High School ay gagawing 110-bed quarantine facility.
Aniya, pangangasiwaan ito ng San Juan Medical Center at City Health Office.
Gagawin rin aniya itong staging area para sa mga kumpirmadong kaso ng COVID-19 bago i-admit sa San Juan Medical Center.
Bukod sa hospital beds, dadagdagan rin ang pasilidad ng mobile x-rays, medical supplies at mga gamot.
Sa ngayon nasa 44 na ang kabuuang bilang ng kumpirmadong kaso ng COVID-19 sa San Juan City.