Nagsagibo nin Lake Buhi Stakeholders Consultative Meeting an lokal na gobyerno kan Buhi kan nakaaging Nobyembre 23-24, 2022 na ginibo sa Merlsig Reception Hall Sagrada, Buhi, Cam. Sur. An nasabi nang pag-uurulay inatindiran kan mga stakeholders kan Lake Buhi asin mga bisita hali sa man-iba-ibang ahensya kan gobyerno asin mga opisina na may kina-araman sa nasabi nang danao.
Sa nasabi nang meeting saro sa mga aktibidad na ginibo kan Lake development Office para matawan duon an pag-papakarhay asin kapakanan kan Lake Buhi parti sa kasuguan ni Mayor Rey Lacoste poon na siya magtukaw guiraray bilang alkalde kan Buhi
Mientrastanto sa laog ni duwang aldaw nagtao nin mga presentasyon an mga naimbitaran na mga ahensya asin opisina dapit sa mga leyes na nakakasakop sa lake Buhi para sa pangangataman kaini, kun saen may mga rekomendasyon man na itinao na magiging basehan kan LGU Buhi sa pag-sagibo nin mga plano.
Kabali sa mga ahensya asin opisinang nag-aratinder kinabibilangan kan BFAR, Environmental Management Bureau (EMB), NCIP, NFRDI, DENR, PENRO kan Batangas DENR-CENRO Iriga City DTI asin mga opisina kan LGU Buhi, kabali man sa mga nag-atinder hali sa People’s Energy Service Inc. Phil. Coast Guard, DepEd, DOST, DPWH, CBSUA, mga Punong Barangay asin Kagawad, Fishcage Operatosr asin iba pang opisina na nagbali sa nasabing urulay.
Sa ngonian ginigibo kan LGU Buhi an sarong strategic plan para sa Lake Buhi base naman sa napag-urulayan sa nasabing tiripon. (JV Navarro Verdeflor Jr., photo courtesy of LGU Buhi)