MOKABAT sa P93,610,766.96 milyones ang income sa kamerkaduhan ning syudad sa tuig 2024 ubos sa administrasyon ni Mayor Rolando `Klarex’ Uy sigun kini sa gibutyag sa kadagkuan sa City Economic Enterprises and Business Development Administration (CEEBDA).
Si CEEBDA Department Manager Sean Molig namahayag nga misaka sa 13.68 porsiyento ang collection sa kamerkaduhan sa tuig 2024 kumpara sa tuig 2023 nga adunay P82,345,088.27 nga income.
Hinuon, matud ni Molig nga aduna gihapon delinquent nga mga stall holders kay dili kini malikayan apan gipangitaan og paagi sa CEEBDA nga makakolekta bisan sa ginagmay aron dili mosamot og dako ang ilang mga bayronon.
Gipasabot ni Molig nga bisan daghan ang mga delinquent vendors, walay stall nga gisirado sa CEEBDA subay usab sa tinguha ni Mayor Klarex nga mahatagan og higayon ang mga vendors nga makapadayon sa ilang panginabuhi ug dili mosamot ang ilang kalisod.
Sa kasamtangan, adunay kapin dos mil ka stall holders/vendors ang Cogon market, usa ka libo kapin sa Carmen market, samtang 183 usab sa Puerto market.
Samtang nangandam na usab karon ang CEEBDA alang sa umaabot nga renewal sa business permit sa mga vendors sa kamerkaduhan karong bulan sa Pebrero.