Davao del Sur – Personal nga giinagurahan ni Senador Christopher Lawrence Bong Go ang giila nga One-Stop-Shop facility nga moatiman sa tanang medikal nga panginahanglanon ilabi na sa mga kabus nga molupyo sa Davao del Sur. Ang nahisgutang pasilidad nga ika 89 nga Malasakit Center nahimutang sa Provincial Hospital sa Digos City, Davao del Sur.
“Kini nga Malasakit Center alang kini sa katawhan sa Davao del Sur, inyo ning kwarta hinungdan nga kamo ang angayang makabenepisyo niini…. Usa lamang ang rekisitos aron makabenepisyo sa Malasakit Center, ang inyong pagka Pilipino”. Pahayag ni Senador Bong Go atol sa inagurasyon kagahapong adlawa.
Ang bag ong Malasakit Center pagadumalahon sa mga personahe sa Philippine Health Insurance Corporation (PhilHealth), Department of Social Welfare and Development (DSWD), Philippine Charity Sweepstakes Office (PCSO), ug Department of Health (DOH).
Gipasabot pa ni Senador Bong Go nga nag unang makabenepisyo sa Malasakit Center ang mga giilang “Kabus sa tanang Kabus” nga dili na mahasol pa sa taas nga panahon ug oras sa pagpila sa mga ahensiya sa Kagamhanan sanglit anaa na lamang kini sa sentrong bahin sa Probensiya.
“We will push for more centers as what I promised to the Filipinos,” dugang pa sa Senador.
Sa pikas bahin, si Davao del Sur Governor Douglas Cagas mipadayag sa iyang pasalamat sa katukuran sa Malasakit Center sa Probensiya. Sumala pa sa Gobernador nga dako kining tabang alang sa mga kabus nga molupyo sa probensiya. Dugang pa niini nga iyang gipasalamatan si Presidente Rodrigo Duterte ug Senador Bong Go sanglit gihatag sa probensiya ang gipangayo niini nga Malasakit Center.
“I am thankful that he [Go] remembers Davao del Sur. This will help our people big time,” sumala pa ni Governor Cagas dihang gihinabi sa Media atol sa inagurasyon sa Malasakit Center. (OIC Michael Manguhig, RPN DXKT Davao)