Gipahimangnoan ang publiko sa grabeng kainit sa panahon human narekord sa PAGASA Mactan Complex Station sa Lapu-Lapu City ang heat index nga miabot og 37°C alas 3:00 sa hapon kagahapon Mayo 10, 2026.
Base sa report, ang temperatura niabot sa 31.4°C samtang ang relative humidity narekord sa 66 porsyento. Sumala sa PAGASA, ang maong lebel sa heat index ubos sa “Extreme Caution” nga mahimong hinungdan sa heat cramps ug heat exhaustion.
Gipasabot usab nga ang dugay nga pagpabilin ilawom sa init nga panahon o padayon nga bug-at nga kalihokan mahimong mosangpot sa heat stroke nga delikado sa panglawas.
Tungod niini, gitambagan ang mga residente nga kanunay moinom og igo nga tubig aron malikayan ang dehydration. Gihangyo usab ang publiko nga limitahan ang mga kalihokan sa gawas ilabi na sa udto hangtod hapon diin pinakainit ang panahon.
Giawhag usab ang tanan nga mopabilin sa mabugnaw o landong nga lugar kutob sa mahimo aron malikayan ang dili maayong epekto sa grabeng kainit.
I via Renante Socia Lada