Cebu City – Gibisbisan sa mauwanon nga kahapunon ang subli nga pagpahigayon sa ground breaking sa ₱ 3.7 Billion Socialized Housing Project ubos sa PPP kon Private Public Partnership tali sa PMI Corporation ug sa Lapu-Lapu City Government, Hunyo 23, 2021.
Gitambongan kini sa kadagkuan ug mga representante tali sa Local Government Unit (LGU) pinanguluhan sa Mayor Junard “Ahong” Chan ug sa private partner.
“Kung unsa kabundak ang uwan…, mao usab kadako ang matabang niini sa mga Oponganon nga makabaton na gyud sila og luwas ug nindot nga pinuy-anan,” mensahi ni Mayor Chan.
Niadtong Hunyo 22, 2021, napahigayon ang pinirmahay sa Memorandum of Agreement tali sa syudad ug sa PMI Corporation.
Kahinumdoman, ang maong 25 ektarya nga luna gigahin ni kanhi Presidente Gloria Macapagal Arroyo pinaagi sa usa ka Presidential Proclamation;
Desi otso ka tuig na ang milabay pero wala gyud na implementar ang maong proyekto.
Gisayangan kaayo si Chan sa mga katuigan nga wala magamit ang maong dakong luna ug napahimuslan na unta kini sa mga katawhan labi na sa mga informal settler o urban poor.
Pero ang importante alang sa mayor nga nahatagan og katumanan ug naa na gayuy mapaabot ang mga Oponganon nga sinugdanan sa transpormasyon sa Dakbayan.
Gitinguha nga ang Syudad sa Lapu-Lapu mahimong ‘Little Singapore.’ (Jhon Tadlip/JTY)
(News & photos courtesy by Junard “Ahong” Chan)