Binigbig ni Mr. Hashler Garalde ti Environment and Natural Resources Office ti kinapinget ni Gob. Matthew Marcos Manotoc a mangipatungpal kadagiti programa ken proyekto para iti pannakasaluad ti aglawlaw.
Segun kenkuana, gapu iti naan-anay a suporta ti gobernador ket agtultuloy ti panagsagsagana ti opisinada kadagiti proyekto pakaseknan iti pannakattagiben ti aglawlaw.
Impannakkelna a napintas ti pannakasaluad dagiti “greening program” ti probinsia iti kallabes a kalgaw babaen iti tulong dagiti barangay ranger officers a katulungan ti probinsia a mangaywan kadagiti kakaykaywan ti probinsia nangnangruna kadagiti adda iti sakop dagiti “reforestation project” ti probinsia.
Inlawlawagna a nakapatpateg ti pannakatagiben dagiti nadakamat a kakaykaywan gapu ta ditoy ti paggapgapoan ti ubbog a mausar a pagpadanum kadagiti kataltalonan.
Mangnamnama ni Garalde a babaen iti napintas a pannakatagiben dagiti watershed areas” ket pagnam-ayan to ti sumarsaruno a henerasyon. (Cita Macalipis, RPN DZRL Batac Correspondent)
(Source: Provincial Government of Ilocos Norte)