Hingpit nang gidili karon dinhi sa Zamboanga del Norte sa pagpasulod sa buhing baboy, boar semen, lokal ug imported nga baboy ug uban pang fresh/frozen ug giproseso nga karneng baboy, pasaw ug wala marehistro nga swine ug poultry feeds sulod sa 90 ka adlaw.
Kini base sa Executive Order Number 20-5 Series of 2020 nga giluwatan ni Governor Roberto Uy kaniadtong Pebrero 4, niining tuiga gumikan sa African Swine Fever (ASF).
Ang Department of Agriculture mikonprimar nga kaniadtong Enero 31, niining tuiga adunay 1,000 ka baboy ang namatay gumikan sa African Swine Fever didto sa lungsod sa Don Marcelino, Davao Occidental.
Sumala sa Section 10.5 sa Implementing Rules and Regulations of the Meat Inspection Code nga ang LGU Meat Inspection Service (LMIS) ang mo participate sa control paglihok sa meat products isip integral part sa national animal disease control and eradication programs.
Niini, ang Zamboanga del Norte panguluhan ni Governor Roberto Uy mi-konsiderar nga ang ASF usa ka seryosong hulga sa lokal swine industry sa probinsya gumikan kay makatakud kini.
Ingon man, ang mga hayop sayon ma-transportar gikan sa Davao Occidental padung dinhi sa probinsya sa Zamboanga del Norte., mao nga kinahanglan mapakgang ang pagsulod dinhi sa buhing baboy, fresh/frozen,processed pork ug uban pang pork products, pasaw ug unregistered hogs ug poultry feeds gikan sa bisan asang parte sa nasud pasulod dinhi sa probinsya.
Kini isip usa ka aktibong pamaagi aron mapakgang ang pagkuyanap sa ASF virus ngadto sa buhing baboy dinhi sa probinsya ug aron sa pag-proteher sa kinatbuk-ang katawhan gikan sa posibleng epekto sa maong sakit.
Niini, gidili ang pagpasulod sa nahisgutan sa unahan nga nagagikan gawas sa Zamboanga del Norte ilabi na nga nagagikan  sa mga apektadong probinsya.
Walay buhing baboy gikan sa gawas sa Zamboanga del Norte ang paga-ihawun sa slaughterhouse dinhi.
Ang pampublikong sakyanan diin ang rota pasulod dinhi ang dili tugutan sa pagdala o magtransportar sa baboy ug produkto niini.
Ang duha ka syudad ug 25 ka lungsod ang gimanduan ni Governor uy nga magpahimutang ug Livestock Quarantine Stations sa strategic locations.
Tumong sa checkpoints aron mapakgang ang pagsulod sa mga buhing baboy ug sa nahisgutan sa unahan.
Ang Livestock Quarantine Stations sa tanang entry points sa Zamboanga del Norte ang gimanduan nga ipadala ang shipment sa maong mga hayop balik ngadto kung diin kini nagagikan.
Media coverage kalabot na sa ASF sa probinsya kinahanglan ipag-koordinar kini sa Provincial Information Center ug sa Provincial Veterinarian.
Gidid-an ang mga hotel, kan-anan, resorts ug uban pa sa  pagpamaligya ug pagpanghatag sa pasaw.
Gidili usab ang pag-gamit, pagbaligya ug pag-display sa imported frozen pork gikan sa mailhing naapektuhan nga nasud ug dapit alang sa restaurant, hotel, wet market groceries ug supermarket.
Samtang alang sa Food Waste Disposal sa mga establismento nga adunay Environment Compliance Certificates, kinahanglan mosunod sa Environment Management Monitoring Plan ug sa ECCs.
Hingpit nga gidili ang pagpakaon sa pasaw.
Sa maong Executive Order, gipaklaro ni Governor Uy nga ang revocation sa tanang permit nga gi-issue ni bisan kinsa, tag-iya ug sa mga establismento kon dili sila makatuman niini.