Governor Solon Nangimbita Sa Munato Festival

Governor Solon Nangimbita Sa Munato Festival

by RPN
37 views

Padayon ang pag-imbita ni Governor Steve Chiongbian Solon nga saksihan sa mga katawhan ang giandam nilang mga programa alayon sa selebrasyon sa ika-27 nga foundation anniversary sa Sarangani Province ug ika-17 nga MunaTo Festival.

Kagahapong adlawa, si Governor Solon mismo ang nag-deklara sa pormal nga pag-abri sa kasaulugan kuyog ang mga mayores, bise mayores, municipal kagawad, barangay officials, ang libuan ka mga empleyado sa matag munisipyo ug Kapitolyo, mga personahe sa national government agencies, uban pang kahugpungan, ug sila Vice Governor Elmer De Peralta ug mga board member, hilabi na ni Board Member Dr. Ruiz sa Tourism Committee.

Kung nagdasok ang Sarangani Capitol Gymnasium atong Miyerkules sa gabii sa mga padula sa MPBL isip soft opening sa MunaTo Festival 2019 kauban mismo nitambong si Pambansang Kamao Senador Manny Pacquiao, napuno usab sa mga indibidwal ang center stage atubangan sa Kapitolyo kagahapon.

Nahimong bibo ang opening program, at the same time anniversary program, tungod sa gipahigayon nga Employees Day kung diin sa pag-parada pa lang hangtud sa cheering competition sa mga empleyado, naghudyaka na ang palibot. Gideklara nga kampyon sa mass dance ug Sarangani Got Talent ang mga kawani sa LGU Malapatan sa pagpanguna sa ilang Mayor Jun Sumbo ug Vice Mayor Jean Delos Santos.

Segun ni Governor Solon, naka-sentro ang matag tuig nga foundation anniversary ug MunaTo Festival sa pagpasalamat sa mga grasya ug panalangin gikan sa Kahitas-an ug sa padayon nga panaghiusa sa Tri-People nga katambayayong sa pagdala og kalinaw ug kalambuan sa tibuok Sarangani Province. Dili lang matud pa panahon sa MunaTo ginatagaan og importansya ang mga Lumad, Muslim ug Kristyano kundili sa adlaw nga tanan pinaagi sa mga kalihukan ilalum sa Sulong Sarangani flagship program, sa pag-ayuda sa pito (7) ka mayor ug 141 barangay kapitanes.

Karong buntaga sa Byernes, matigayon ang MunaTo IP Day ug Tribal Sports, dinhi makita ang traditional sports sa mga kaigsoonang lumad gamit lang ang kakusog ug kalaski sa lawas. Sundan usab dayon karong hapon sa Sarangani Week of Peace alang pud kini sa atong mga brother and sister sa Muslim community.

Nagpadayon pud hangtud na ni sa adlaw nga Sabado ang Craft Conference, Exhibition and Cultural Presentation. Gani, gibisita kini kagahapon ni Congressman Ruel Pacquiao sa iyang paghidangat sa Sarangani Capitol.

Karong gabii ang gikahinaman nga Pearl of Sarangani beauty pageant. Alas dyes sa buntag (10am) karong adlawa mao na tong pagpasalida sa Bird of Prey, ang padayong pag-konserba sa mga agila nga anaa pa sa mga kalasangan sa Sarangani.

Daghang mga dumuduong ang nibisita sa MunaTo Festival 2019, tulo (3) niini ang mga foreigner nga gikan pa sa nasud Belgium didto sa Europa, sila Michelle de Cort, Thomas Coninx ug Arne Stevens. Ilang naadtuan ang water tubing sa Maitum ug ang Lamlifaw Blaan Village Museum sa Malungon. Plano pa nilang adtuan ang Glan aron sud-ungon matud pa ang nindot nga sunset kon ang pagtiklop sa adlaw padulong sa kagab-ihon, ug ang paragliding area sa Maasim, ang gikonsidera nga paragliding capital sa entiro Pilipinas.

Dili kuno tinuod ang ginaingon kanila didto sa Europa nga delikado adtuan ang Pilipinas tungod kay nakita man matud pa nila nga hapsay ang probinsya sa Sarangani, ug maayo matud pag pagtratar kanila ang mga tao. Halos tanan matud pa kabalo mu-English bisan sa ilang masakyan nga mga traysikel driver, maong wala matud pa sila nalisdan sa komunikasyon.

(Photo: Sarangani Congressional District, MIO Malapatan, Jake Narte, Christian Bek)

0 comment

Related Posts