CAGAYAN DE ORO – Dako ang kabalaka ni Misamis Oriental Governor Bambi Emano sa panglawas sa katawhan sa pakigbatok sa coronavirus disease human nagpagawas sa bag-ong kamanduan ang Inter-Agency Task Force on Emerging Infectious Disease sa nasyonal nga low-risk province ug dili na ipaubos sa community quarantine ang Misamis Oriental ug Cagayan de Oro sa Mayo 16. Kini bisan pa man ang iyang apela nga unta ipaubos sa enhanced community quarantine sa MisOr ug CDO gumikan sa kumpirmasyon sa Department of Health nga adunay local transmission.
Gani si Emano nagpadala sa sulat kang Presidente Rodrigo Duterte paghangyo sa IATF sa nasyonal nga mas pahugta ang kwarantina sa maong dapit. Apan tapos gipagula sa maong inter-risk area sa hulga sa coronavirus, girespetuhan kini sa gobernador tungod sa pagtuo nga mas labaw mang nasayod ang hugpong apan dako iyang kabalaka niining kahimtanga.
Samtang sa pikas bahin, gipahibalo ni Emano nga nahidangat na ang 6,250 ka mga diagnostic kits sa Misamis Oriental ug gitakda kining iapod-apod ngadto sa 25 ka lungsod ug duha ka syudad sa probinsya, buot lang niini nga nakaandam na kining test kits sa panahon kon ugaling aduna na silay mamonitor nga mga suspect sa coronavirus disease.