Nagpalagip ni Gob. Matthew Marcos Manotoc babaen iti Provincial Resiliency Office dagiti amin a Local Government Units a kitaen ken isagana a nasayaat dagiti bukod a quarantine facilities.
Inlawlawag ni Local Disaster Risks Reduction Management Officer 1v Mr. Marcel Tabije a daytoy ket tapno maakumudar amin dagiti agsangpet a returning residents ken local stranded individuals.
Inadmitirna nga amin a LGU’s ditoy Ilocos Norte ket addaanen iti bukod a quarantine facilities ngem adda da pay laeng dagiti kurang ti kuarto na, dibision, naan-anay a pagibasuraan, air ventilation ken dadduma pay.
Maibasar iti data ti Provincial health Office, dandani 500 dagiti returning residents ken Local Stranded Individuals ti agdama a mangus-usar ken nangusar kadagiti siam nga isolation facilities gapu ta 238 kadagitoy ti nakakumpleton iti 14 a day quarantine.
Inpalgak pay ni Mr. Tabije, nga agtultuloy met iti panangisayangkat dagiti frontliners iti inaldaw a monitoring ken mangkitkita iti pannakaiwardas dagiti fasilidad tapno masigurado iti naiget a panangsurot da kadagiti pagannurutan.
Maipalagip nga inyunay-unay met ni Gob. Marcos Manotoc nga awan ti makalusot a saan a dumalan iti self-quarantine iti probinsia.
Impatalged iti ama ti probinsia nga amin nga agsubli wenno agawid ditoy Ilocos Norte a saan nga Authorized Persons Outside Residence ket dumalan iti dua a lawas a quarantine kadagiti fasilidad ti Ilocos Norte.