Cebu City-Nagpalit ang kagamhanan sa dakbayan sa Mandaue og mortuary freezer van nga masudlan og hangtod sa 40 ka patayng lawas aron kabutangan sa mga mamatay sa coronavirus disease samtang dili pa ma-cremate o masunog.
Sumala pa sa PIO o Public Information Office, mao kini tubag sa
problema sa mga mulupyo sa kabutangan sa lawas sa mamatay nilang mga
minahal nga samtang maghuwat sa cremation.
Gitataw sa PIO nga libre ang pagpagamit sa maong mortuary freezer ilabi na sa mga nagkalisod-lisod subay sa gitanyag nga free cremation services sa gobyerno sa Mandaue niadtong mamatay sa Covid 19.
Segun sa post sa PIO sa Facebook, gihimo kini sa kagamhanang local aron paghupay-hupay sa kasubo ug kahigwaos sa mga Mandawehanon sa pagpangita og dapit nga kabutangan sa patayng lawas sa ilang mga minahal.
Sila si Mayor Jonas Cortes ug mga representante sa Department of Health o DOH-7 mitan-aw ug misiksik gahapon sa mortuary freezer van nga gimontar sa Mandaue City District Hospital.
Matod ni Cortes, pinaagi sa libreng storage services sa mortuary freezer makadaginot ang pamilya og gikan sa 8 ngadto sa 10 mil nga storage fees matag adlaw sa pribadong pasilidad samtang magpaabot nga ma-cremate ang minatay.