Napalaus ti panagyaman ni Gob. Matthew Marcos Manotoc iti agtultuloy a suporta nga ipapaay ti departamento ti agrikultura kadagiti mannalon ditoy probinsia.
Daytoy ket kalpasan nga adda manen t lima a milyon a pisos nga inpaay ti DA para kadagiti mannalon ti probinsia a naggapo iti programa nga enhance kadiwa ni ani at kita.
Nailatang ti nasao a pundo para iti pannakaipasdek ti consolidation and trading facility for agricultural products iti ili a bacarra.
Mainaig iti daytoy, naisayangkat iti immune-una a gundaway ti “groundbreaking” ti nasao a pasilidad nga indauloan ti gobernador ken dagiti opisial ti ili a bacarra iti panangidaulo ni Acting Mayor Douglas Pilar.
Ditoy nga impadanon ti gobernador ti panangnamnamaba a makatulong ti Ilocos Norte iti panagkurkurang ti taraon ditoy pagilian.
Ginutigot ti gobernador dagiti mannalon ditoy probinsia a mangitultuloy a mangsupusup iti pagkurkurangan ti pagilian a taraon a dakkel a tulong tapno maalay-ayan ti panagparparikut ti pagilian iti pannakapataud ti umdas a taraon para kadagiti amin a Filipino.
Maipalagip a ti benepisiario iti nasao a pasilidad ket Bacarra Zanjera Multi- Purpose Cooperative ti ili Bacarra.
Inlawlawag ni DA Regional Director Nestor Dumenden iti mensahe nga inbasa ti nangibagi kenkuana a ni Mrs. Helen Castaneda a ti pannakaipaay ti nasao a pasilidad ket paset iti panangbigbig ti DA iti kaadda ti commitment, napintas a panagkakammayet ken panagkaykaysa ken ti kaadda ti determinasyon dagitoy nga agballigi.
Impadanon ti director ti DA ditoy rehiyon uno ti panangnamnamana nga iti pannakaipasdek ti nasao a pasilidad ket ad-ada pay ngaumadu ti apit dagiti mannalon ditoy probinsia.
Kunana a babaen iti pannakaiyestablisar ti nasao a pasilidad ket maikkanda ti gundaway a mangukkon kadagiti produkto dagiti mannalon ditoy probinsia ket dagitoy ti agserbi a “marketing arm” ti rehiyon.
Innayonna a babaen iti daytoy ket maidanon dagiti produkto ti probinsia iti kadiwa ni ani at kita market iti rehiyon agingga idiay Manila. (Irene Ringor, RPN DZRL Batac Correspondent)
(Source: Provincial Government of Ilocos Norte)