Cebu City- Dili maayong idali-dali paglibkas ang ECQ kun enhanced community quarantine sa higayong mobahar na ang pagkatap sa coronavirus disease kun covid 19 pandemic.
Kini ang gipadayag ni Gob. Gwen. Garcia atubangan sa mga sakop sa media usa ka semana gikan sa pagpaubos sa probinsiya sa ECQ.
Sa pangutana kon hangtod kanus-a ang ECQ, si Garcia miingon nga dili pa siya makahatag og petsa sanglit daghan pang factor ang kinahanglang ikonsiderar.
Sa iyang giluwatang Executive Order No. 5-O, wala isulti asa o kanus-a kutob ang ECQ nga gitawag sa uban og lockdown.
Gipasabot sa gobernador nga dili siya mohatag og petsa kay basig dili matuman ug mahug siyang bakakon busa mas maayong i-open lang kini hangtod asa kutob ang hulga sa virus.
Gitug-an ni Garcia nga ang Department of Health kun DOH-7 mipahibawo kaniya gahapon sa hapon nga ang gidaghanon sa mga kaso sa Covid 19 sa entero Cebu, lakip sa mga gawanong siyudad, nagpabiling 30.
Kini naglakip sa 22 sa Cebu City, 3 sa Lapulapu, 3 sa Cebu province, ug 2 sa Mandaue.
Gitug-an ni Garcia nga 54 ka swab sample sa probinsiya ang uwahing gi-test sa subnational laboratory sa Vicente Sotto Memorial Medical Center (VSMMC).
Sa maong mga sampol, walay usa nga nagpositibo sa coronavirus disease.