Cebu City- Giobligar ang mga mayor, local health officers ug kapolisan sa lungsod sa pagpatuman sa gitawag og home quarantine kon adunay ilang mulupyo nga nagkinahanglan sa ingon.
Mao kini unod sa EO kun executive order nga giluwatan ni Gob. Gwendolyn Garcia.
Sa maong EO, ang mga local chief executive ang adunay bug-at nga papel sa implementasyon sa 14 ka adlaw nga kwarantina sa tanang mangabot nga pasahero gikan sa China ug special administrative region – ang Macau ug Hong Kong.
Lakip sa rekisitos sa home quarantine ang pag-andam og buwag nga lawak diin temporaryong magpuyo ang tawong ikwarantina.
Pinasikad sa EO, kinahanglang walay immunocompromised persons sa balay nga estahan sa pasahero nga i-quarantine.
Ang immunocompromised persons mao kadtong nagbaton og laing sakit nga nag-edad og ubos sa 10 o kaha lapas sa 60 anyos.
Nahinabi sa media, si Garcia miingon nga ang iyang EO nahasubay sa travel ban nga gimando ni Presidente Rodrigo Duterte batok sa mga langyaw nga gikan sa China.
Apil sa ban ang direct ug connecting flights.
Ug tungod kay wala may labot ang mga Pinoy sa ban, gimando ni Duterte ang pagpaubos kanila sa 14 ka adlaw nga kuwarantina.